تذكرتك ،،،، بقلم الشاعر جبار الشمري

تذكرتك وي كل جرة نفس حرگة
صدگ من گال تكتل تذبح الفرگة
تخيلتك علة الحيطان وبلاية
انسان تحس نيران بالشبگة
شهگتك وي هوة أنفاسي
وشفت الموت بالشهگة
حقها تلومني احلامي
دموعي بعيني مختنگة
چف المايلوحة چف
ما يفرح بكل طگة
الما حنولة ايدة بيوم
يتأذة من كل صفگة
مرة يموتها ابنادم
والمفارگ يمد خلگة
ما تطلع سكنت الروح
طحت ما راحت الطلگة
غيابك خلة أثر بية
مثل مفشوخلة بفسگة
لا كاتل ولا مكتول
جارة محشمة عل وسگة
حطني صورة فوگ الباب
بس أخذ الگلب لزگة
ضيم الوكت أوچر بيه
من كل كتر شگة
مثل حبي الك والله
لا هيهات ما تلگة
مثل عشرة ضرس وي ناب
اذا مو يمة شگ حلگة
سجنك عل جبل ينشاف
وانة اعضاي منسحگة
واذا اوصل و أفك الباب
كومة تيول مسرگة
كلما فكرت انساك
الگة اشموع معتلگة
وحدي بغرفتي بالليل
تاخذني غفل عرگة
ثيابك دوم اعطرها
ويمي الدنية محترگة
كلما تعتگ اعتز بيك
شجرة وحاضنة الورگة
يلي كلشي منك هيل
انة مخاويك لو ترگة
تعال انعوض الي راح
نكسر حاجز الملگة
.......جبار الشمري.....